■自我介紹
Hello大家好！我係sha sha，來自香港嘅交換生，最鍾意去旅行！當我去日本旅行時，我被日本人嘅善良、文化和自然景色所吸引，於是我喺2024年1月開始了日本的留學生活喇。而家正在努力學習日文，喺休息時間會學習日本嘅傳統文化，又或者周圍去下玩，尋找當地美食。我希望同當地人交流嘅同時提升自己嘅日語能力，將來喺日本搵到工作。順帶一提，我有拍YouTube片，主要係講下我喺日本嘅生活，旅行中發現嘅有趣的地方和美食的影片，如果你有興趣就訂閱支持下我啦～→よろShasha香港人闖日本 （睇完影片有咩感想都歡迎留言俾我傾下計！）
■京都新晚上特色景點
京都係一個世界各地既朋友都會想去既地方，會去寺廟同埋其他名勝古蹟，特別係櫻花同紅葉季，著和服影相亦都係一大特色。
今次嚟講嘅就再特別D，因為京都府立植物園為左慶祝成立100周年，所以就搞咗啲新意思。喺夜晚嘅時候去睇植物，大家又有冇試過呢？
我之前未去過京都府植物園架，由北口入場後，沿路都見到好多"Light cycle Kyoto"嘅指示牌，所以入場一路行去溫室展場嘅時候都好期待，唔知道會有乜野新奇嘅體驗等緊我哋呢？去到溫室附近，首先見到門口有個極巨大嘅"Light Cycle Kyoto"燈牌，個溫室係由透明物料建造，喺外面就可以見到入面一直變色，因為有啲人流限制，所以我哋就喺外面等候嘅時候都好期待。唔止係變色架，仲有其他閃燈，所以係諗像緊溫室入面會係一個點樣嘅模樣。
※呢個溫室場館入面總共有4種體驗，大會建議全程共45分鐘
1.Light will find you
2.Memory of water
3.Invisible
4.Forest frequencies
好嘢，終於輪到我哋入場喇！一踏入場，突然見到眼前好夢幻，好多煙霧，喺燈光照射下，感覺好震撼，就仿彿突然有種脫離現實嘅超現實感覺，就好似進入咗另一個狀態。好啦，開始享受！
首先入去第一個區域-"Light will find you"，感受好特別，因為極多密集嘅線狀燈光由頭上照射落嚟，轉呀轉呀，燈光好似有追蹤眼咁，一直追住你唔放咁嘅感覺。
之後入去第二個區域-""Memory of water"，喺光影照射下，有種放慢心情嘅感覺，可以感受住水流，突然覺得好似感受到大自然嘅力量。
之後繼續行，進入下一個區域之前有個緩衝位，可以俾大家再三回味一下，再消化一下之前兩個區域嘅感受。
一踏入第三個區域-"Invisible"，首先眼睛會突然變得好迷幻，瞳孔突然收細，再加上現場嘅音樂，有種感覺自己唔係人類，而係變成咗動物。隨住音樂同燈光嘅配合，會覺得自己似冷血嘅爬蟲生物，有時又覺得自己似兇猛嘅哺乳類生物。
因為呢種感覺好特別，所以隨住唔同嘅音樂響起，大家都一度停低，慢慢地觀賞，感受平時作為人類並唔會有嘅感受。
最後第4個區域係"Forest frequencies"，喺呢度可以聽到寂靜嘅植物同你對話，點解會咁呢？當企喺植物面前嘅時候，聽住音樂，就好似聽到植物嘅心聲同呼吸，同佢溝通緊咁，係一種好神奇嘅感覺。
最後見到"完結"嘅牌，原來咁快就到尾聲喇，真係好唔捨得。最後都駐足欣賞，發現池塘反映住燈光嘅倒影，離開嘅時候仲有果種心跳嘅感覺!
■總結
今次嘅體驗都比較特別，因為我對京都嘅印象係寺廟、古色古香，但原來仲可以有其他嘅體驗。呢個活動只係去到12月26號，大家快D去體驗下啦～ 順便一提，而家 京都有1日券，可以搭巴士、地鐵啦，平時晚上好多景點都會關門，而家有呢個植物園嘅夜間活動，就可以由朝玩到晚，岩晒香港人咁鍾意玩嘅性格啦！
搭車都有2種方法架，巴士、地鐵：
1）京都市営地下鉄「北山駅」落車3號出口一出就到
2）京阪巴士1號線在「植物園前」巴士站下車，步行約5分鐘
■YouTube:
Shorts: 京都府立植物園✨LIGHT CYCLE観覧温室で4つの体験🌳光と音が織り成す幻想的な世界💥100 years anniversary, experiences with music & light
Video: To be confirmed