■自我介紹
大家好！我係香港出生、來自英國嘅留學生，曾浩賢。嚟到日本留學之前，我分別喺香港同英國做過嘢，從事足球教練同埋其他唔同行業。近年日本足球急速咁成長同發展，特別係喺世界盃嗰時出色嘅表現，令到我對日本足球產生咗濃厚嘅興趣。作為前職業球員同現職嘅足球教練，就係因為咁，為咗發展、開拓我嘅足球事業，我決定嚟到日本留學。2023年3月，我開始咗日本嘅留學生活，首先讀日文，然後2024年4月開始喺日本工學院八王子專門學校，修讀運動健康學科入面嘅足球課程。作為學科入面唯一、而且最大年紀嘅留學生，要實現我嘅夢想，我就必須要比其他學員花上好幾倍嘅努力同毅力先至得！幸運嘅係，我由中學嗰時就已經對日本動畫同音樂產生咗濃厚嘅興趣——呢個都成為了我喺度繼續奮鬥嘅原動力之一。舊年，我通過咗JLPT N2嘅語言能力測試，依家我正努力為挑戰JLPT N1嘅語言能力測試而準備！請大家幫我加油呀！
■14年間嘅愛，日本歌姬：LiSA嘅魅力
咁事不宜遲，嚟為大家介紹呢位喺日本動畫音樂界舉足輕重嘅歌姬「LiSA」啦！我由2010年，佢喺電視動畫《Angel Beats!》劇入面隊band「Girls Dead Monster」（簡稱「GDM」）出道嗰時，我就已經係佢嘅fans啦！屈指一算，到依家已經14年啦！喺呢14年間，我參加過她大大小小嘅演唱會同活動，一共有成21場！睇完呢篇文，你哋就會知道LiSA到底係乜嘢令我咁著迷？佢嘅魅力又係啲乜？而對佢感興趣嘅話，又應該點樣開始呢？
魅力①：LiSA嗰種充滿穿透力同爆發力嘅聲線
好似我前面所講，我成為LiSA fans 嘅契機，就係佢喺電視動畫《Angel Beats!》入面擔任劇中嗰隊band「Girls Dead Monster」（簡稱「GDM」）嘅第二代主唱「ユイ」（由依，或譯唯、結衣）嘅代唱嗰時開始。當LiSA版嘅主題曲《My Soul, Your Beats! (Gldemo ver.)》前奏一響起嗰時，嗰種令人起曬雞皮嘅搖滾活力，時至今日都完全無變過！LiSA嗰種充滿穿透力同爆發力嘅聲線，唔單止成功吸引咗我同埋觀眾們，亦都成為咗佢唱歌風格嘅一大特色！
假如你都對呢隻歌有興趣或者係有少少好奇，甚至係老觀眾想再三回味嘅話，可以撳下面條
講到《Angel Beats!》，就梗係不得不提其中一首劇中歌——「一番之寶物」（一番の宝物）啦！「一番的寶物」同前面講到LiSA搖滾版本嘅《My Soul, Your Beats! (Gldemo ver.)》唔同，佢係一首情感豐富又感人嘅抒情曲，無論係曲風、歌詞，定還是LiSA佢嘅演繹方式，都同角色「由依」個心境同埋《Angel Beats!》嘅劇情fit到漏油！我次次聽呢隻歌嗰時，都總會畀呢隻歌所帶出嚟嘅feel，勾起劇中感動嘅回憶同畫面。甚至連LiSA本人，喺演唱會唱呢隻歌嗰時，不時都會忍唔住喊咗出嚟。「一番之寶物」唔單止是fans之間公認嘅神曲，同時都好可能是日本動畫史上其中一首最膾炙人口嘅歌。
無論係從未接觸呢隻歌嘅你，定抑或係想重拾呢份感動嘅你，都高度推薦你撳下面條YouTube link聽聽。
※上文張圖係LiSA佢喺高中時期喺嗰度演出，位於日本岐阜縣嘅「柳ヶ瀬ants」
魅力②：疼錫、珍視fans 用言語做交流嘅LiSA
・Fans團名：リサラボっ。
・Fans嘅稱呼：LiSAッ子
・演唱會嘅稱呼：約會（デート）
・CD或DVD嘅稱呼：情書（ラブレター）
LiSA非常重視「言語」間交流呢件事，唔單止將為fnas們親切咁稱為「LiSAッ子」，仲將佢嘅演唱會稱為「約會（LiVE）」，而CD或者DVD等就稱之為「情書（CD）」。呢啲LiSA專屬嘅用語，唔單止令fnas們感受到同自己嘅偶像更加親密，仲成為了一眾LiSAッ子、甚至係LiSAッ子同埋LiSA之間親切嘅密語一樣咁。而且佢仲經常會睇fnas喺社交媒體上面嘅留言（特別係喺X），除咗會偶爾撳吓link、轉發吓，甚至仲會follow埋fans嘅帳號！呢啲旁人睇起嚟起嚟雖然只係個微不足道嘅小舉動，但對我哋LiSAッ子嚟講，知道自己嘅心意有好好傳遞畀到自己所愛嘅偶像，就已經係超越一切嘅莫大喜悅啦！
魅力③：演唱會上滿滿嘅幸福感
講到LiSA嘅演唱會，其實就冇咩複雜難明嘅規則，無論係因為《鬼滅之刃》主題曲《紅蓮華》、或者《炎》而入坑而成為fans嘅你，都一樣可以輕鬆咁享受佢嘅演出。當然啦，如果你想更加深入咁體驗日本演唱會嗰種令人熱血沸騰嘅感動同幸福感，我會建議你跟吓fans們嘅「應援」（Call）。你諗吓，當全幾千、甚至過萬個觀眾，整齊劃一咁「打Call」同她打氣嗰時，嗰種全場一體嘅感覺可以話係無與倫比咁正！
假如你對呢種「應援」有啲興趣，可以撳吓下面條YouTube link，感受吓LiSA嘅演唱會有幾震撼啦！
★LiSA『LiVE is Smile Always〜LiVE BEST 2011-2022 & LADYBUG〜』 -Teaser1 -
★LiSA LiVE is Smile Always ～ASiA TOUR 2018～[eN ＋ core] LiVE & DOCUMENT TEASER MOViE
唔知大家聽完之後覺得點呢？能夠身處呢片空間，為自己鐘意嘅偶像搏曬命咁「打call」真係非常幸福！如果試過一次呢種喺現場同成班LiSAッ子搏命為LiSA打call，一齊參與呢演唱會嘅話，我諗邊個都會變成一試難忘、返唔到轉頭嘅身體！大家假如有機會嘅話，真係要去吓LiSA嘅約會（演唱會）呀！
■ LiSA嘅專屬結句：「今天都係個好日！Bye-Chii！」
嚟到演唱會嘅最後，臨別依依，LiSA都實會同大家嗌返聲：「今日都係個好日！Bye-Chii！」（「今日もいい日だっ！ばいちー！」）——「Bye-Chii！」（「ばいちー！」）呢句係佢家鄉岐阜縣嘅鄉下話，意思就係「再見」咁解。Fans們都會大聲咁向佢嗌返「Bye-Chii！」，呢種好似朋友一樣咁嘅互動，除咗令觀眾感受到場演唱會真係就嚟完，同埋期待住下次再玩過之外，亦都展示緊 LiSAッ子佢哋同LiSA之間深厚嘅感情！即使係唔太敢大嗌出聲嘅我，喺呢片氛圍之下也漸漸學識盡情咁嗌「Bye-Chii！」嚟回應LiSA。大家假如真係有幸去到LiSA的約會（演唱會），喺最後時刻真係試吓一齊嗌「Bye-Chii！」啦！呢一刻絕對會成為你畢生難忘嘅畫面之一，呢世都記得！
■結語
以上就係我對日本動畫音樂界舉足輕重嘅歌姬「LiSA」嘅介紹了，大家點睇？藉著呢篇文章，希望可以畀大家對LiSA有更多嘅了解，甚至開始接觸佢嘅音樂——多一個人都好丫！我由大學時期到出嚟社會做嘢、又由打工仔變到依家喺日本又讀返書，唯一不變嘅就係我對LiSA嘅愛同支持——而且將來都一定唔會變。希望你哋都可以搵到一個值得你撐一世嘅偶像啦！「仲有得推嗰時，就出力推落去！」呢句嘢真係講得啱！無論生活幾咁難頂，我都藉著LiSA嘅音樂獲得咗撐落去嘅動力同勇氣，希望你哋都可以一樣啦！
最後，「今日都係個好日！Bye-Chii！」多謝你哋睇曬篇文！